Bòrd-stiùiridh

Catrìona Nic an t-Saoir

Tha Catrìona aithnichte mar phrìomh thidsear na Gàidhlig ann an Alba le a bliadhnaichean fada de dh’obair agus eòlas. ‘S i am ball as ùire den Bhòrd-stiùiridh, air dhi tilleadh dhachaigh do dh’Uibhist. Tha Catrìona air a bhith ag obair gu cunbhalach le Ceòlas mar thidsear Gàidhlig ri linn na sgoil-samhraidh fad na 6 bliadhna mu dheireadh. Tha ceangal fada aice ri Sabhal Mòr Ostaig agus bidh i ag obair mar thidsear solarachaidh Gàidhlig ann an sgoiltean nan Eilean Siar. Bha Catrìona na cathraiche air Fèisean nan Gàidheal fad grunn bhliadhnaichean. Chaidh a thoirt a-steach dhan Trad Hall of Fame.

Dòmhnall Iain Dòmhnallach

Tha Dòmhnall Iain na einnseanair aig Comhairle nan Eilean Siar.  Bha e ag obair do chompanaidh comhairleachaidh einnseanairidh ann an Glaschu, agus cuideachd do J. J. MacDonald Contractors ann an Uibhist. Thar an 10 bliadhna aig a’ Chomhairle, tha dleastanas air a bhith aige don obair mhòr càraidh bho sgrìos stoirmean, a’ gabhail a-steach leasachaidhean na Fadhlach a Tuath, agus Sgeamaichean Dìona Còrsa Uibhist & Bharraigh. Tha Dòmhnall Iain na Stiùiriche air SURE (Neart Ath-nuadhachail Uibhist a Deas). Tha e na bhall de Chomataidh Coitchinn Ghèirinis agus buidhnean coimhearsnachd leithid Guthan an Iar.

Iseabail (Nic a’ Chlèirich) NicDhòmhnaill

Bha Iseabail ag obair fad 25 bliadhna mar Àrd-Mhanaidsear Leasachadh Eaconomaigeach do IGE, ag obair sna h-eileanan eadar Beàrnaraigh na Hearradh agus Bhatarsaigh. Ged a leig i dhì a dreuchd, tha i air a bhith an sàs ann an iomadh phròiseact thar nam bliadhna, bho stèidheachadh chompanaidhean beaga gu leasachaidhean mòra, a’ faotainn eòlas ann an leasachadh eaconomaigeach agus sòisealta sna h-Eileanan Siar. Tha Iseabail na Stiùiriche do Chothrom Ltd, cathranais ionadail a bhios a’ cur chothroman trèanaidh air dòigh don choimhearsnachd, a’ ruith cròileagan Gàidhlig, agus a tha a’ fàs gnìomhachas ath-chuairteachaidh. Tha i na ionmhasair do dh’Eaglais na h-Alba an Uibhist a Deas.

Iseabail (NicCoinnich) Dhòmhnallach

Tìdsear mar dhreuchd agus cruitear mar chleachdadh. Ball de Bhuidheann Smachdachaidh nam Fiadh ann an Uibhist. Rannsaiche san sgioba ionadail air an tinneas Lyme. Pìobaire agus eòlaiche-dualchais bhon teaghlach MhicMhuirich. Pàrant agus ball sgairteil den choimhearsnachd.

Maighread Walker

Tha Maighread a’ toirt beairteas de dh’eòlas gnìomhachais do bhòrd Ceòlas. Mar thè-gnìomhachais thar 20 bliadhna, bha Maighread os cionn oifig a’ phuist an Dalabrog bho 1994 a-mach. Mar thoradh air an obair aice, tha an oifig-phuist aig teas-meadhain na coimhearsnachd ionadail agus na ghnìomhachas seasmhach làidir. Tha i gu math aithnichte sa choimhearsnachd. Tha Maighread air a bhith an sàs ann an Ceòlas bho thòiseach tòiseachaidh, agus tha a’ choimhearsnachd glè thaiceil rithe.

Màiri T NicAonghais

‘S i cathraiche Ceòlas Màiri T NicAonghais, agus tha iomadh dreachd air a bhith aice sa choimhearsnachd a’ buntainn ri foghlam, a’ Ghàidhlig, agus ionnsachadh inbheach. ‘S i bana-mhaighstir Sgoil an Iochdair, na riochdaire am buidheann Riaghaltas na h-Alba Gaelic Learners in the Primary School, ball de 1+2 language learning in the Western Isles, oide airson trèanadh luchd-obrach le Foghlam Alba, aon de na prìomh bhuill an Uist Core Learning Group, agus tha eòlas farsaing aice ann an leasachadh coimhearsnachd. Tha Màiri air a bhith na ball de na bùird aig grunn bhuidhnean ann an Alba, leithid Comhairle Ealan na h-Alba agus MG Alba. Bha i cuideachd na ball de chomataidh Co-chomunn an Iochdair agus Talla an Iochdair, ball tùsail aig Cothrom Ltd agus Fèis Tìr a’ Mhurain. Tha i air bòrd Bhòrd na Gàidhlig.

Pauline NicDhòmhnaill

Tha Pauline air a bhith an sàs ann an Ceòlas fad 15 bliadhna. ‘S i aon de na prìomh thidsearan-ciùil ann an Sgoil Lìonacleit, agus bha i a’ teagasg ann am Barraigh agus Vancouver. Tha i na ball, tè-stiùiridh, agus oide le Còisir Eaglais Chaitligeach Earra-Ghàidheal agus nan Eilean, cluicheadair orgain agus tè-stiùireadh na còisire ionadail san eaglais agus chuidich i gu bhith stèidheachadh Còmhlan-Pìob Sgoil Lìonacleit. Bha Pauline na ball de grunn bhuidhnean coimhearsnachd a’ gabhail a-steach: Comhairle Pàrant Sgoil Dhalabroig, Gleus Community Music Group, Co-chomunn an Iochdair agus Talla an Iochdair.

Iseabail NicAonghais

Bidh Iseabail NicAonghais ag obair do NHS Eilean Siar mar Health Protection and Screening Nurse Specialist. Ann an 2018 fhuair Isabell duais Winston Churchill Travelling Fellowship, a leig leatha siubhal dha Na Stàitean, Canada agus an Fhraing gus coinneachadh ri eòlaichean ag obair air gartan agus an tinneas Lymes. Ann an 2019 chuir Iseabail crìoch air MSc ann an Infection Prevention and Control agus bha an tràchdas aice a’ coimhead air buaidh an tinneis Lymes air maitheas na beatha.

Bha Isabell roimhid air comataidhean chròileagan agus sgoiltean agus bha i na cathraiche air Fèis Tìr a’ Mhurain fad sia bliadhna. Tha i an ceart uair na rùnaire do Thalla Staoinebrig a tha a’ co-òrdanachadh pròiseict luach £21,000 gus ionad-èiginn a leasachadh aig an talla.

Ailig O’ Henley

Tha Ailig air a bhith ag obair mar neach-naidheachd UEFA ann an Alba bho 2004 agus tha e aithnichte dhan choimhearsnachd Ghàidhlig mar chraoladair agus neach-aithris airson BBC Alba agus Radio nan Gàidheal. Tosgaire Gàidhlig na Bliadhna ann an 2016, b’ e Ailig a’ chiad Oifigear Gàidhlig a bh’ aig Pàrlamaid na h-Alba eadar 2000-2002 a’ stèidheachadh ’s ag àbhaisteachadh follaiseachd agus cleachdadh na Gàidhlig anns gach raon de dhòighean-obrach na Pàrlamaid. As dèidh ceumnachadh bho Oilthigh Ghlaschu chuir e seachad bliadhna a’ cruinneachadh faclan Gàidhlig sna h-Eileanan a Deas airson pròiseact Faclair na Gàidhlig mus deach e a-steach gu craoladh mar dheasaiche agus leughadair-naidheachdan aig a’ BhBC agus b’e a’ chiad phreseantair air a’ phrògram naidheachd telebhisean, Eòrpa. Sna bliadhnaichean mu dheireadh tha Ailig air barrachd ùine a chur seachad a ruidh cruit an teaghlaich ann an Uibhist a Deas a thuilleadh air obair mar chraoladair ball-coise.